“Tradita Popullore” kontribuon në ruajtjen, ekspozimin dhe promovimin e veshjeve dhe materialeve të tjera etnografike shqiptare. Ne kemi punuar prej vitesh, me anë të të gjitha mundësive dhe alternativave, në të gjitha nivelet dhe grupmoshat, për ruajtjen dhe shtimin e njohurive që lidhen me gjuhën, zakonet, traditën, dhe trashëgiminë kulturore në Shqipëri, në mbarë rajonin shqiptar dhe jashtë tij, si dhe më gjerë.
“Tradita Popullore” ka ushtruar veprimtari të ndryshme në:
1. Programet e trajnimit për të gjitha grupmoshat për mësimin e riprodhimit të veshjeve, bizhuterive dhe aksesorëve të tjerë që janë elementë të trashëgimisë sonë kulturore materiale, me synim ruajtjen e kësaj tradite.
2. Aktivitetet sociale, artistike dhe kulturore në shpalosjen e vlerave të etnokulturës shqiptare tek të gjitha grupmoshat, duke bashkëpunuar dhe me fondacione të tjera të kësaj fushe, si dhe me institucione të ndryshme shtetërore brenda dhe jashtë Shqipërisë.
3. Organizimin e panaireve të ndryshme, në të cilat synohej promovimi i artizanatit dhe nxitja e vetëpunësimit te femrat, në funksion të fuqizimit të rolit të tyre në jetën social-ekonomike.
4. Pjesëmarrja në konferenca dhe forume mediatike me interes për kulturën, traditën dhe trashëgiminë folklorike, në funksion të rritjes së njohurive në këto fusha për gjeneratat e reja pasardhëse, si trashëguesit kryesorë të këtyre kulturave materiale e shpirtërore.
5. Organizimi dhe pjesëmarrja në evente artistiko-kulturore, si konkurse bukurie, festivale folklorike, sfilata, performanca artistike, koncerte, ekspozita, panaire të artizanatit të veshjes dhe një mori aktivitetesh të ndryshme në sajë të iniciativave sipërmarrëse dhe bashkëpunimeve me partnerë të ndryshëm privatë e institucionalë.
6. Përfaqësimi i Shqipërisë, duke promovuar kostumografinë tonë në muze e sallone të huaja (etj.).
Qëllimi ynë:
1. Ruajtja e artizanatit të veshjes si një fenomen në zhdukje.
2. Promovimi i artizanatit si një element i rëndësishëm identifikues.
3. Nxitja në përfitimin e këtij zanati si një mundësi e mirë për vetëpunësimin e shumë femrave të zonave të ndryshme rurale të vendit tonë.
4. Promovimi dhe ruajtja e origjinalitetit të veshjeve popullore shqiptare.
